Zaixzar,  ti  cidee  sofzai  u  nngxee  hviatix'ar.    Toaxhviaf  putchie  kawkoaix,  siofti  si  cidee  chigaai.   U-cidjit,  hit'nngxee  hviatix'ar  zhamsioong  boeq  laai  kekciuo. 

Siofti  mng  toaxhviaf  korng:    "Larn  na  kongkef  laai  kekciuo,  lie  si  boeq  zhud  sviafhoex?   Ar  goar  tioqaix  zhud  sviafhoex  leq?" 

Toaxhviaf  ixn  y  korng:    "Lie  tioh  zhud  bie,  goar  boeq  zhud  zuie."

Siofti  goxnggong,  sviu  cidsii-ar  ciaq  koq  korng:     "Chinchviu  afnny  laai  kekciuo,  ar  ciuo  na  kek'hor,  si  boeq  afnnar  pwn?  Larn  citmar  to  laai  kofngtvia  ciaq  hor." 

Toaxhviaf  korng:   "Hef  si  zaizay  ee  su,  nar  tioh  korng.   Goar  zhud  zuie,  sofie  ciuo  si  engkay  ho^goar  ee,  ki'uu  zhwn^ee,  lorng  si  lie  ee." 

Siofti  gaxmgam,  ciu  korng:   "Si  afnny  ox.   Goar  toxsi  boexhiao  ciah  mng^lie  ee,  tvaf  goar  oexhiao  laq,  lie  korng  afnny  putcie  kongto."

Hitsii  ti  pvi'ar  u  laang  thviafkvix,  ma  bo'oe  korng.   Tag'ee  cy'u  teq  svaf-tuiesioxng  naxtvia.

U-cidee  laang  chiuo^nih  theh  cidzheng'khof,  u-cidjit  twtioh  cidee  sarnchiaq-laang,  aeboeq  ciofng  kaki  ee  hofgiah  tuix  y  laai  khoa'iau,  ciu  korng:   "Goar  u  cidzheng'khof,  lie  ui-symmih    boboeq  zunkexng  goar  leq?" 

Sarnchiaq^ee  ciu  korng:    "Lie  u  cidzheng'khof,  mxkuo  hef   si  lie  ee  mih,  kab  goar  boo  siongkafn,  goar  zunkexng  lie,  boo  symmih'iesux." 

Hofgiah^ee  koq  ka  y  korng:    "Goar  na  ciofng  cidpvoax  pwn  ho  lie,  lie  kvar  ciu  oe  zunkexng  goar,  hvox?"

Sarnchiaq^ee  kohzaix  korng  khaq-u  iesux  ee oe,  y  korng:    "Lie  u  cidzheng'khof,  kaki  laau  goxpah'khof,  ar  ciofng  goxpah'khof  pwn  ho  goar,   afnny  lie  kab  goar  ciu  u  pvikang  ee kimcvii,  goar  nar  tioh  zunkexng  lie  leq?" 

Hofgiah^ee  ciu  koq  korng:   "Na  afnny,  goar  na  ciofng  cidzheng'khof  zoanpo  ho  lie  ee  sii,  lie  zofngboo  korng  afnny  ia  boboeq  zunkexng  goar  ee  toxlie^aq." 

Sarnchiaq^ee  ciu  korng:    "Lie  ee  cidzheng'khof,  goar  na  lofngzorng  theqliao,  lie  to  lorng  bocvii  laq.   Hitsii,  lie  to  zunkexng  goar  ciahsi  tioh^ee.    Goar  kohkhaq  boo-ly'iuu  laai  zunkexng  lie^aq." 

Cidee  hofgiah-laang,  khie  cidkefng  viulaau.    Khie-hor,  ciu  chviafkheq  koq  pvoahix.    Hoaxnsi  u  ka  y  kiongho^ee  lorng  laai  ho  y  chviar. 

Zerng'langkheq  tag'ee  tof  olor  korng:    "Lie  sidzai  u  pwnsu,  oextaxng  khie  ciahniq'toaxkefng  koq  ciahniq'suie  ee  viulaau."

Yn-bor  putcie  gaau,  ti  auxthviaf  thviakvix  zernglaang  teq  olor  yn-afng,  yi  ciu  thoex  yn-afng  ixn  yn  korng:    "Zef  si  lirn-zernglaang  ee  tie'ixm,  mxsi  goarn-afng  cidee  laang  ee  zaitiau  sor-tix ee."

Kitiofng  u  cidee  langkheq  tngr^khix  ciu  tuix  yn-bor  korng  boflaang  ee  bor  cingaau,  ciu  ciofng  yi  sor-korng  ee  oe  korng  ho  yn-bor  thviaf. 

Cit'ee  bor  ixn  y  korng:    "Cit'ho  oe  sviaflaang boexhiao  korng  leq?    Goar  ma  oexhiao  korng."

Kehnii,  yi  svy  cidee  kviar,  boeq  zox  moafgoeh.    Yn  ia  chviaftoq  koq  zorhix,  langkheq  laai  ka  yn  kiongho,  ciu  ho  yn  chviar.

Zerng'langkheq  tag'ee  tof  olor-korng:  "Lie  cyn-zaitiau, oe  svy  ciahniq'kofzuy  ee  ve'ar."

Yn-bor  ciu  ixn  yn  korng:   "Zef  si  lirn-zernglaang  ka  goarn  tao'khachiuo  ee,  mxsi  goarn-afng  cidlaang  ee  zaitiau."

Zernglaang  thvialiao,  ciu  moaftoong  chiox-kaq  boeq  tor^loqkhix. 

Langkheq  tngfkhix  liaw'au,   yi  soax  khix  ho  yn-afng  phaq-kaq  pvoafsie.

U  cidee  chvimii^ee,  ti  armsii  zhutmngg  ee  sii,  muypae  lorng  tiafmtefng  teq  kviaa. 

U-laang  mng  y:    "Chinchviu  lie  chvimii  ee  laang,  giaqtefng  u  symmih'loxeng  leq?"

Y  ciu  ixn  yn  korng:   "Lie  sviu  kikoaix  ma  si  tioh^ee.  Goar  armsii  teq  kviaa  ee  sii,  tiarm  tefng  khaksid  boo  symmih  lox'eng. mxkuo  goar  na  giah  cit'ee tefng  hiah'ee  bagkngf^ee  ciaq  boe  laai  zengtioh  goar.   Koq  befchiaf  ma  lorng  oe  siarm  tuix  pvi'ar  khix.    Sidzai  si  cyn-hofsex^aq." 

Hit'ee  laang  thvialiao  toaxtoa  poexhok.   Y  ciu ciofng  cit'ee  taixcix  korng  ho  padee chvimii^ee  thviaf.   Taixkef  lorng  tong'ix  hit'ee  sviuxhoad,  y'au  zhutmngg  ee  sizun  to  lorng  giah  tefng  laq. 

U-cidaxm,  ti  loxtiofng  u  nngxee  chvimii^ee  teq  svama.   Cidee  korng:  "Lie  nar  laai  zengtioh  goar?   Lie  boo  khvoarkvix  citky  tefng  maq?"

Iao  cidee  chvimii^ee  ciu  korng:  "Lie  teq  korng  symmih?   Si  lie  laai  zengtioh  goar  ee,  goar  u  giah  tefng,  lie  kiarm  boo  khvoax^kvix?" 

Afnny  maxlaai-maxkhix,  soaq boeq  khychiuo  siophaq.

Twtuo  hit'ee  sizun,  u  cidee  laang  tuix  hiaf  kengkoex,  oafkhix  ka  yn  poefkhuy,  ciaq  ka  yn  nngxee  korng  kisit  yn  ee tefng-hoea  ykefng  sid^khix   laq.

Yn  nngxee  ciaq  hoxsiong  hoe-mxtioh,  hunkhuy  tuix  tafng-say  khix.

Ti  cidee  sofzai,  u  cidee  svizox  cyn-phvayphiaq  ee  laang.   Bolun  symmih'taixcix  to  kofcib  mxkherng  niu^laang.   Y  ee  hauxsvy  ia  si  cyn-phvayphiaq  ee  laang,  taghang  lorng  chinchviu  yn-laupe  ee  khoafnsid.

U-cidjit,  u  cidee  langkheq  laai  yn-taw.   Yn-lauxpe  laau  y,  boeq  chviar  y  ciah  etaux-png,  ciu  kiox  yn-hauxsvy  khix  chix'ar  boea  zhaix  kab  hii-baq. 

Cit'ee  hauxsvy  ciu  khix  boea  kuynaxhang  ee  zhaix  kab  hii  kab  baq.   Y  kvoa  ti  chiuo^nih  tngr^laai.   Twtuo  y  tngflaai  kaux  svia'mngg-khaf,  zhaotwkharm  kab  cidee  laang  sva'twthaau. 

Hit'ee  laang   ia  si  cidee  putcie  koaephiaq  ee  laang,  boboeq  siafmkhuy  ho  laang  koex^khix.

Sof'ie  nngxlaang  ti  hiaf  tidtit  khia^teq,  khia  u  kuynax'tiafmzefng-
kuo. 

Ti  cit'ee  sizun,  yn-lauxpe  ti  zhux^nih  teq  tarn  yn-hauxsvy  tngr^laai.

Y  korng:   "Boo-tekkhag,  goarn-hauxsvy  khix  ho  laang  phaq^six  laq.   Na  boo,  ciahniq'voax  laq  iaoboe  tngr^laai.    Goar  tioh  laikhix  khvoarmai  leq." 

Y  ciu  zhud^khix.    Ar  khix  kaux  svia'mngg-khaf,  boliau  khvoarkvix  yn-hauxsvy  kab  hit'ee  laang  khia  ti  hiaf  teq  sva'tuiesioxng.

Lauxpe  ciu  mng  hauxsvy  korng:  "Zef  si  afnnar  ee  leq?"

Hauxzvy  ciaq  ciofng  hit'ee  zengheeng  siongsoex  korng  ho  yn-lauxpe  thviaf.

Hit'ee  lauxpe  thvialiao  ciu  korng:   "Kahsi  afnny,  nafsae  tioh  niu^y  leq.   Hor,  lie  sefng  kvoa  zaix  kab hii-baq  tngr^khix,  goar  ciaq  thoex  lie  kab  y  ti  ciaf  khia." 

Kofzar  ti  cid'sofzai  u  cidee  goxnglaang.    Cit'ee  laang  ee  lauxpe  korng:   "Bin'afzaix  si  koeanii,  lie  theh  cvii  khix  boea  mixhurn  kab  baq,  ciuo, thngg  kab  aq.    In'ui  boeq  ka  lie  zox  svaf,  lie
ia  suxnsoax  boea  porliau  tngr^laai." 

Cit'ee  laang  korng:   "Hor,"   ciu  kvoa  na'ar  khix  koe'ar,  boea  hiah'ee  mih  liaw'au,  tngflaai  kaux  pvoarlo.   Hiaf,  y  kaux  cidkefng  zhux  ee  mngkhao,  khvoartioh  cidciaq  kao.    Hitciaq,  zhuix  khuikhuy,  y  ciu  sviu:  "citciaq  kao  kvafnar  si  paktor  teq  iaw."    Y  ciofng  boea^laai  ee  baq  lofngzorng  taxn  ho  y  ciah. 

Koq  kviaa  kuypo'ar,  thviakvix  na'ar-lai  ee  aq  teq  hao.    Y  sviu: "kvar  si  teq  zhuietaf,"    ciu  ka  hitciaq  aq  paxng-loqkhix  khoezuie-toea,  boeq  ho  y  ciah  zuie.    Ah'ar  jip  zuie,  ciu  juo-siuu  juo-hng^khix. 

Y  khvoax  zef  ciu  tioqkviaf,  kynkirn  theqzhud  na'ar-lai  ee  mixhurn,   ia^loqkhix,  boeq  sviaa  ah'ar  tngr^laai.    In'ui  ah'ar  koq  siuu^khix,  y  to  theqzhud  na'ar-lai  ee  thngg,  koq  ia^khix.   Ia   si  bohau. 

Y  cyhor  koq  kviaa.   Ti  hiaf  y  khvoartioh  u  tek'ar-zaang  ho  hofng  zhoef  teq  iotang,  ciu sviu,   "tek'ar  itteng  teq  kvoaa,"   ciu  theqzhud  porliau  ka  y  paw^teq.

Koq  kviaa  kuypo,  khvoarkvix  cidtex  toa-cioqthaau,  tefngbin  pitpid,  u  phang,  ciu  sviu,  "cioqar  itteng  si  zhuietaf  laq,"  ciu  ciofng  boea^laai  ee  ciuo,  tox  ti  cioqphang.    Afnny  y  ciaq  tngr^laai. 

Kaux  zhu,  yn-lauxpe  mng  y  korng:  "Lie  khix  koe'ar  boea  mih,  u  boea^laai  boo?"

Cit'ee  laang  ciu  ciofng  y  ti  lo^nih  sor-zox  ee  taixcix  lorng  korng  ho  y  thviaf.

Yn-lauxpe  ciu  korng:   "Bin'afzaix  si  koeanii,  lie  afnny,  ma  cyn-boo-hoatto."

Zaixzar  u  cidee  bagkngf^ee  kab  cidee  chvimii^ee,  nngxlaang  lorng  si  ciwkuie.

U-cidjit,  bagkngf^ee  sviuxboeq  koae  hit'ee  chvimii^ee  laai  lym  ciuo,  ciu  korng:  "Larn  kongkef  boea  ciuo  laai  lym,  hor^boo?" 

Chvimii^ee  ciu  mng  y:  "Muylaang  tioh  khay  joaxzoe  cvii?   Koq,  larn  boeq  lym  ee  sii,  tioh  laikhix  goar  ee  pangkefng  lym,  hiaf  khaq-axm."

Bagkng^ee  ixn  y  korng:  "Hor.   Muylaang  khay  siekag-guun  ciu  hor.   Larn  boea  svakoaxn  ciuo,  ia  boea  cidkoar  thotau-jiin."

Yn  ciu  suisii  khix  tiarm'ar  kvoa  ciuo  laai,  korng: "Tvaf  laikhix  pangkefng-lai  lym."

Chvimii^ee  korng,  "Hor.  Kvoa-laikhix  goar  ee  armpaang  lym."

Svakoaxn  siociuo,  kvoaxkhix  pangkefng-lai,  nngxlaang  theh  toaxvoar,  pvipvii  thiin   laai  lym.

Bagkngf^ee  thauthau'ar  sviu:   "Ciuo  afnny  lym^loqkhix,  si  boeq  afnnar  ciaq  oe  ho  y  lym  khaq-cior  leq?"     Ciu  ciofng cidkoaxn  thauzhaxng  ti  pvi'ar. 

Yn  cidkoaxn  limliao  ciu  ka  ciwkafn  khngx  ti  pvi'ar,  ar  khuy  lexnggoa  cidkoaxn,  koq  keasiog  lym.

Toexjix'koaxn  khuy-khylaai  lym  ee  sii,  chvimii^ee  theqzhud  toexsvaf'koaxn,  kab  hitkoaxn  khngx-zorhoea.      Bagkngf^ee ciu  kynkirn  ka  hef  ciab^laai,  ciarmteq  thiin  ti  kaki  ee  voar^nih.

Yn-nngxee  ciofng  hitkoaxn  toexjix'koarn  ee  ciuo  iaxsi  pvipvii  thiin  ti  nngxlaang  ee  voar^nih,  korjieen  bagkngf^ee  ee  ciuo  u  khaq-toax'voar.    Yn  ciu  keasiok  lym.

Cit'ee  sizun, bagkngf^ee  ciaq  kafmkag  ciuo  nar  boo  symmih  zubi,  y  ciu  mng  chvimii^ee  korng:  "Kikoaix,  citkoaxn  nar  ciahniq  poh.   Goar  lym^khylaai,  kvafnar bobi-bobi?"

Chvimii^ee  korng,  "Kiarm  afnny?   Goar  to  boo  kafmkag  leq."

Goanlaai,  thaau-cidkoaxn  lim-liao  y'au,  chvimii^ee  to  theh  hitky  khafng-ciwkafn  khix  soea,  laixbin  he  zuie  ciaq  ho  y  khngx-oexzai.    Bagkngf^ee,  si  in'ui  kaki  u  ciofng  toexsvaf'koaxn  siefn  theh^khylaai  khngx  ti  pvi'ar,  ciaq  liaqzurn  chvimii^ee sor-theh^laai  ee  ciuxsi  citkoaxn,  siefn  thauthau'ar  ciofng  hit'laixbin  ee zuie  thiin  ti  kaki  ee voar^nih.

Ti  cidee  sofzi,  u  Tviw  Safm  kab  Liie  Sux,  yn  cin'aix  svazvef.

U-cidjit,  yn  giah  tithaau  khix  suun  zhanzuie.    Tviw  Safm  khia  tiarm  ti  kaki  ee  zhanhvoa,  khvoax-koexkhix  kehpiaq-khw  ee zhaan,  ciu  thox  cide  toaxkhuix,  korng:  "Ae'ioq,  ciahniq'hor  ee zhaan !    Zef  loh  ti  padlaang  ee  chiuo,  sidzai  cyn-bozhae.   Goar  na  uxcvii,  tof  ka  y  boea^laai." 

Liie  Sux  ixn  y  korng:  "Uxviar^boo?    Goar  ma  tidtit  teq  sviu  aix  ka  y  boea^laai.   Nar  thafng  ho  lie  boeq^khix  leq?"

Tviw  Safm  ciu  korng:  "Goar  kienchii  boeq  boea,  m  ho  lie  boea^khix."

Nngxlaang  svame  soaq  svazefng,  kaux  boefchiuo,  Liie  Sux  tuix  Tviw  Safm  korng:  "Chinchviu  ciahniq'toa  ee  su,  larn  ti  ciaf  keakaux  ma  boo-su'viaa.    Larn  putjuu  laikhix  kvix  kvoaf."

Liie  Sux  giuo  Tviw  Safm  ee  chiuo,  khix  kaux  ge'mngg,  khvoax-jip  laitoea,  twtuo  khvoaxkvix  u  cidee  zheng  tngsvaf  ee  laang  boeq  zhud^laai.    Yn-nngxlaang  liaqzox  si  kvoa'oaan,  ciu  susii  kui^loqkhix. 

Tviw  Safm  ka  hit'ee laang  korng:  "Chviar  lie  thviaf  goar  korsox.     Goar  u  boeq  boea  cidkhw  zhaan,  khiogsi  cit'ee  Liie  Sux  suxau  ciaxm  khix  boeq  boea.   Goarn  oankef  si  afnny  khy'yn  ee." 

Liie  Sux  ia  korng:  "Goar  sviu  boeq  boea,  ykefng  sviu  cviakuo  laq.   Goar  nar  oe  niu  y  leq." 

Hit'ee  zheng  tngsvaf  ee  laang  thviaf  yn  liofnghofng  ee  oe,  ciu  khuizhuix  mng  korng:  "Lirn-nngxlaang  sor-boea  ee  zhaan  ti  tofui?"

Nngxlaang  ciaq  korng:  "Toa-lofiaa,  zhaan  toxsi  iawboe  boea,  goarn  ciaq  teq  svacvy,  na  si  boea-liao,  tekkhag  tioh  siophaq  laq." 

Zheng  tngsvaf^ee  chiorchiox  korng:   "Lirn,  zhaan  to  iawboe  boea,  ar  goar,  kvoaf  to  iawboe  zox,  thefnghau  goar  zorkvoaf  leq,  ciaq  laai  ka  lirn  zox  kongchyn  ma  boe  ban." 

Y  pvoa  chiw'ngr  ciu  zox  y  jib^khix.   Yn-nnglaang  mng  laang  ciaq zay  yn  ka  y   kui  ee,  hit'ee  si  kvoagee  ee  sukix,   ciu  cviaa-oarnzheq,  cyhor  phvi'ar  bongbofng-leq   kaki  tngr^khix. 

Kofzar  tuy  zngf^nih  u-laang  laai  hwsviaa  chviax  cidee  hoesviu,  twtuo  hitjit  thvy  teq  loqho,  lo  cyn-phvaykviaa,  sofie  ciu  chviax  cidee  kio,  laai  ho  y  ze^khix.   Hoesviu  zhng-hor  to  khix  ze  kio. 

Yn  khix  kaux  sviagoa  ee  lo^nih,  mxzay  afnnar  kio-toea  soax  lag^khix.   A'ioh,  cyn-boo  siafsix,  hoesviu  ciu  poah^tor,  ar  y  ee  kasef  lorng  khix  baktioh  lokomoee  laq. 

Kngf-kio  ee  saihu  sviuxtioh  cviaa-phvaysex,  ciu  khix   khioq  kuytiau'ar  soq  laai,  eng  hef  laai  pag-hor  kio-toea  ciaq  kiox  hoesviu  ze^khylix. 

Hoesviu  simlai  lwnneq,  mxkuo  ho  loh-cintoa,  y  ee  kasef  kab  svaf  lorng  lasaam^khix,  y  na  boeq  zhexngtioh  hef  ti  ho^nih  kviaa,  sidzai  cviaa-phvaykhvoax,  sofie  cyhor  sviuxboeq  koq  ze-khylix  kio-terng.

Y  tuix  kngkio^ee  korng:   "Oea,  kngkio-saihu^aq,  tvaf  mxzay  kio-toea oe  koq  lag^khix  boe. 

Kngkio^ee  ciu  korng:   "Boe  laq,  boe  laq,  biern  kviaf  laq."

Hoesviu  ze^khylix  ee  sii,  kio-toea  teq  vivy-voaiqvoaih  kiox.    Y  putcie  kviaf,  ciaq  korng:  "Afnny  putcie  boo-thortoxng.   Khaq-loflat  leq,  ka  hef  koh  cidpae  pak-hof  hofsex  leq." 

Kngkio-saihu  sviu-laai  ma  uxlie,  ciu  khix  khioq  khaq-tngg  ee    soh'ar  laai,  tuy  kio-terng  kaux kio-toea  thafntit-thafnhvoaai  pagzox  sibji.    Afnny  to  mxkviaf  laq.

Yn  kviaa  kaux  cidee zngsia.   Cit'ee  zngf  u  zuxho,  twtuo  khvoarkvix  u  cinzoe  laang  teq  zuxcip.  cviaa-lauxjiet. 

Kitiofng  u  cidee  laang  khvoartioh  hit'ee  kio,  ciu  tuix  zernglaang  korng:   "A'ioq,  lirn  taixkef  khvoax  hitterng  kio  ox.    Kvafsi  hit'ee  khix  hwsviaa  ee  laang  sie^khix,  tvaf  boeq  ciofng  sinsy  kngf-tngfkhix  yn-zhux  laq.    Laang  ee  taixcix  sidzai  cviaphvae  uliau^aq." 

Ti  kio-lai  ee  hoesviu  thviatioh  cit'ee  oe,  ciu  sviu-korng:  "Oea,  oea,  yn  nar  liaqzurn  goar  si  sylaang  leq?     Khofhun^aq,  khofhun^aq!"   Ciu  tiautii  ti  kio-lai  khaxmzhaux^cide. 

Hit'ee  laang  thviatioh  khaxmzaux,  kviaf-cide,  to  ka  pvi'ar-laang  korng:  "Goar  liaqzurn  si  sylaang  leq,  goanlaai  si  hoaxnlaang  ee  khoafnsid.  Taixkef  mxthafng  oar^khix  ox."

Hoesviu  nar-thviar  nar-siuxkhix.   Y  toxng-boextiaau  laq,  ciu  ti  kio-lai  toaxtioo,  koq  toaxsviaf  hoaq-korng:   "Goar  mxsi  hoaxnlaang  laq,  lirn  mxthafng  laxmsuo  korng!"

Hit'ee  laang  thvia^tioh,  ciu  ka  taixkef  korng:  "Mxsi  hoaxnlaang  laq,  hef  tekkhag  si  siao^ee  laq."

U-cidee  Kar'oh-siefn  ti  zngf^nih  teq  kax  zheq.

Hagsefng  yn-taw,  na  u  zox  symmih'sinbeeng-svy  laq,  kongmar-ki  laq,  lorng  tioh  chviar  siensvy  khix  ciah  siociuo,  siensvy  putcie  aix  ho  laang  chviar. 

Kitiofng  u  cidee  sarnchiaq  ee  hagsefng,  lorng  mxbad  chviar  y.    Hit'ee  siensvy  mng  y  korng:  "Lirn-zhux  lorng mxbad  zox  ki,  si^boo?"    Y  afnny  mng  cviazoe  pae. 

Hit'ee  hagsefng  tngfkhix  ka  yn-lauxbuo  korng:  "Goarn-siensvy,  tauqtauq'mng-korng:  'Larn-taw  si-mxsi  mxbad  zox  ki?' "      Yn-lauxbuo  ciu  zaiviar  siensvy  teq  sviuxboeq  ho  yn  chviar,  khofsioq  zhuolai  khaksit  bocvii  thafng  chviar  y.

Kengkoex  sie'goxjit,  yn-lauxbuo  ka  yn-kviar  korng:  "Kin'afjit  amar  zox  ki,  lie  khix  chviar  siensvy  khaq-zar  laai  larn-taw  zexze  leq." 

Kaux  jit  boeq  taux,  yn-kviar  ciof  siensvy  zofhoea  laai.    Yn  ti  thviaf^nih  ze-teq  thefnghau. 

Yn-lauxbuo  sefng  boea  nngxtex  pviar,  he  ti  hit'ee  thang'ar-pvy,  kefix  tiaxm  ti  thvia'au  eng  khangtviar  zuo-kaq  chichy-zhaqzhah  kaux  sva'sietiarm,  iawboe  thafng  phaang-zhutlaai  ho  yn  ciah.

Siensvy  thefnghau  kaux  ciahniq'voax,  paktor  ykefng  iaw-kaq  toxng-boextiaau,  khvoarkvix  thang'ar-pvy  u  nngxtex  pviar,  ciu  kynkirn  theh-khylaai  ciah.

Hit'ee  lauxbuo  ti  thvia'au  thaukhvoax,  tarn  kaux  siensvy  ciofng  hit'nngxtex  pviar  ciaqliao  laq,  ciaq  zhud^laai  ka  y  kvialea, korng:  "Ho  siensvy  thefnghau  ciah'kuo,  cyn-phvysex  laq."

Citsii,  yi  kviakhix  thang'af-pvy,  khvoax  hit'nngxtex  pviar  boo^khix  laq, ciu  kea-siuxkhix,  kiox  yn-kviar  laai  mng,  korng:
"Lie  cit'ee  iawsiu-ar,  hit'nngxtex  boeq  thau  ciawzhuo  ee  pviar,  laixbin  u  he  tok,  si  lie  thauciah^khix  ee,  hvox?    Koq  lag'tiafnzefng-kuo,  lie  ciu  oe  hoatzog  laai  sie.   Kynkirn  lawsit  korng^laai!" 

Siensvy  thvialiao  ciu  tioqkviaf,  huisioong  ee  hoanlor,  ciaq  kofngzhud  sidzai:  "Hit'ee  pviar  si  goar  paktor  iaw  ciaq  ciah^loqkhix  ee.    Tvaf  boeq  zvayviu  ciaq  hor?"

Lauxbuo  korng:   "Ae'ioh,  tvaf  tioh  kynkirn  ka  y  thox^zhudlaai,  na  boo  oe  sie,  ox."

Ciu  zao-jibkhix  pangkefng,  phaang  cidpvoaa  zuie  zhud^laai.  Kiox  siensvy  lym-cidzhuix  thox-cidzhuix.   Thox-kaq  kui'sengkhw  lorng  bolat^khix. 

Afnny,  siensvy  ciu  tiaxmtiam  tngr^khix  laq.      Hit'ee  sarnchiaq  ee  laang  ciu  mxbiern  chviar  siensvy  ciaqpng  laq.