U  nngxee  goax'ui  ee  zhutgoa-laang,  ti  cidkefng  khehtiaxm^nih  sva-tauhioh,  koklaang  korng  yn-pwntoe  ee  kikhar  ee  su. 

Cidee  korng:
"Lie  kiarm  zay  goarn-hittoe  u  cidkhaf  egtharng,  zhenggoa laang  zox-cid'e  loqkhix  soea  ia  lexngleng."

Lexnggoa  cidee  ciu  korng"
"Hit'ho  tharng  ia  boexthafng  korng  u  kikhar,  aezay  goarn  hittoe  u  cidzaang  teg,  tuy  toexbin  hoad^khylaai,  tekboea  kaux   thviterng,  iao  si  bo'ui  thafng  zhuntngg^khix,  sofie  ciaq  koq  oafn^loqlaai,  hioxng  toexbin,  zef  ciuxsi  cincviax  kikhar  ee  su  laq." 

Taixsefng  korng  ee  laang,  thviakvix  ciu  korng:
"Nar  u  hitkhoarn  ee  toaxteg  leq."
Cit'ee  laang  ciu  korng:
"Na  boo  goar  sor-korng  ee  hit'ho  teg,  nar oextaxng  khof  lie  sor-korng  ee  hit'ho  egtharng  leq." 

Zhengtiaau  ee  sii,  u  cidee  sofzai,  u  cidee  kefngzhad,  teq  aq  cidee  hoaxntioh  taxngzoe  ee  hoesviu. 

Boeq  khix  hoat'vi  ee  lo^nih,  ciaqciuo  ciah-kaq  zuix-bangbaang.

Hoesviu  khvoartioh  hit'ee  khoafnsid,  ciu  ka  thihlien'ar  pag^khylaai,  kattiaau  ti  kefngkvoa  ee  axmkurn,  ar  koq  eng  thiethaau-tof  thix  y  ee  thau'mngg  ho  y  kngf-liuliw.   Kaki  ciu  kvoafkirn  tozao^khix. 

Kaux  keh'zafkhie,  kefngkvoa  ee  ciwkhix  ia  thoex^khix  laq.
Y  zhoe  hit'ee  hoesviu  zhoe-boo.   Botviw-botii  y  khix  sof  kaki  e  thaukhag,  ciu  mxzay  ti  tangsii  thaukhag  soax  kngf-liuliw.
Koq  khvoarkvix  kaki  ee axmkurn  ciu  putcie  kikoaix,  ciu  korng:
"Kaizaix,  hoesviu  iao  ti  ciaf,  zorngsi  goar  mxzay  khix  tofui  leq?" 

U-cidee  kixnsi^ee  itsefng  aeciah  tauxcviux. 
Hit'cidjit,  jit  iawboe  axm,  tuy  goaxbin  tngr^laai.   Twtuo  jibmngg  ciu  khvoaxkvix  toh'ar  ee  tiong'ngf  u  cidtuy  tauxcviux,  ciu  ma  exchiuo-laang  korng:
"Zauthad  miqkvia,  boexhiao  thafng   khiam." 

Kvoafkirn  eng  chiuo  uxn-khylaai  ciah.   Jip  zhuielai  ciaq  zay  si  koesae-kof.   Y  ciu  kynkirn  zao-zhutkhix  goaxkhao  thox.   Eng  zuie  soafkhao,  ciu  ma:
"Tof'cidciaq  sie-koef  laai  tohterng  parngsae?   Y'au  na  ho  goar  koq  khvoax^tioh,  tekkhag  boeq  ka  y  phaq^sie."

Kehtngr-jit,  jit  boeq  axm,  yn-bor  kuun  cidkhvaf  tibaq,  paai  ti  toh'ar-terng   boeq  tarn  y  lerng.   Citsii,  yn-afng  tngr^laai,  cid'e  jibmngg  ciu  liaqzox  si  koef  thiaux-khylix  ti  tohterng.

Hutjieen  sviuxtioh  zaxhngf  ti  hiaf  ciaqtioh  koesae,  cidsii  siuxkhix,
giah  cidky  pwntvaf  zhutlat  tuix  tohterng  koxng^loqkhix, ciu  thviakvix  cidsviaf,  u  symmih  tuy  tohterng  poah^loqkhix, vax-loqkhix  khvoax,  si  cidtex  tibaq,  koq  moar-thokhaf  lorng  si  bahthngf. 

Yn-bor  zao^zhutlaai,  khvoax  zef  ciu  siuxkhix,  toa-tiothiaux. 

U-cidee  zhanzngf'laang  laai  hwsviaa,  ti  koef^nih  kengkoex  cidkefng  moacii-tiaxm  ee  mngkhakhao.    Tiarmlai  ee  laang  teq  kiox-korng:
"Laai  ciah  moacii  ciaq  khix.   Twciaq  ciaq  zhoe-hor  ee,  siosiof  ee moacii  ox."

Y  ciu  sviu-korng:
"Yn  tekkhag  u  moacii  boeq  ho  goar  ciah  laq."

Y  sviu  afnny  to  ze-loqlaai  ciah  svatex.   Ciaqliao,  ciu  boeq  zhud^khix,  cit'ee  sii  moacii-tiaxm  ee  laang  laai  ka  y  thor  moacii  ee  cvii.     Mxkuo  y  boo  pvoarsiern  cvii.    Tiaxm  ee laang  ciu  siuxkhix,  giah  pwntvaf  ka  y  but  lag'e.

Zhanzngf-laang  tngfkhix  yn-zhux.   Kang-zngf  ee  laang  zaiviar  y  u  khix  hwsviaa,  ciu  laai  mng  y  korng:
"Ti  hwsviaa,  bie  kab  toaxmi  ee  hangzeeng  si  symmih'khoarn?" 
Y  ciu  korng:
"Bie  kab  toaxmi  ee  keasiaux,  goar  mxzay.    Zofngsi  moacii  cidtex si  nngx'ee  pwntvaf  laq."

U  cidee  hofgiah  ee  lau-toaxlaang.    Y  kaki  mxbad  ji,  zofngsi  thviaf  laang  khofkhngx  ciu  chviax  cidee  siensvy  laai  kax  y  ee  hauxsvy. 

Cit'ee  gyn'ar  tuy  y  oh  siafji;  siar  cid'oeh  ciuxsi  "id",  siar  nngx'oeh  ciuxsi  "ji",  siar  sva'oeh  ciuxsi  "safm".

Y  ciu  tuix  lauxpe  korng:
"taixkhaix  ji  ee  iegi,  tvaf  goar  lorng oexhiao  laq.   Chviax  siensvy  ma  boo  symmih'loxeng." 

Laupe  thviaf  y  afnny  korng  ciu  cyn-hvoahie,  ciu  ka  siensvy  sitiau.

U-cidjit,  lauxpe  sviuboeq  chviar  cidee  peng'iuo,  y  si  svix  Ban^ee.   Y ciu  kiox  yn-hauxsvy  siar  cidtviw  chviafthiab.   Mxkuo  kaux  tiongtaux,  y  iawboe  siar-hor.    Lauxpe  ciu  khix  supaang  khvoax,  korng:
"Siar  cit'kuyjix'ar  nar  oe  hiahniq  huiekhix?"

Yn-hausvy  ciu  zhuy'ar  ciamciafm  korng:
"Lauxpe^aq.    Lie  kaupoee  hitkhoarn  svix  ee  laang,  cviaa-hai  ox.   Lie  khvoarmai  leq,   goar  tuy  zafkhie  siar  kaux  citzun,  ma  ciaq  siar  kaux  goxpaq  naxtvia,  boeq  afnnar  ciah  ve  siar  kaux  cidban  leq."

U-cidee  kixnsi^ee,  yn-bor  putsii  ka y  khausoeh,  ma  y  hiah'kixnsi  boo  loxeng.

Hit'cidjit,  y  tehboeq  ciah  aphiexn,  zhunchiuo  khix  piaq^nih,  kvoa  iukafn  laai,  thvy  iuu  ti  hongtefng.   Thvi-hor,  ciaoku  boeq  ka  hef  kuix   ti  hit'ee  thihtefng^nih,  zhaotwkharm  cidciaq  hosiin  poe-laai  hioq  ti  thihtefng-pvy,  y  mxzay  ciu  khvoarzox  hef  ia  si  thihtefng,  cidee  kuix,  hosiin  poezao,  iukafn  ciu  kalauh  ar  phahphoax^khix.    Y  siuxkhix-kaq  boehsie. 

Yn-bor  chiox  y  boo-loxeng,  ciu  ti  tw'ar  hioq  hosiin  ee  sofzai,  kef-texng  cidky  thihtefng  ho^y.

Suputty,  yn-afng  khied  hoan'afhoea  cide  khvoax,  iugoaan  si  cidciaq  hosiin  hioq  ti  hiaf  ee  khoafnsid.    Simlai  cyn-siuxkhix,  eng  chiuo  zhutlat  phaq^khix.

Afnny  moafchiuo  si  huiq,  thviax-kaq  boe  korng^tid.   Simlai  sviu,  yn-bor  phvae-simkvoaf  boeq  hai  y,  ciu  liah  yn-bor  phaq-kaq  pvoarsiofsie. 

U  cidee  svix  Tviw^ee.   Y  u  cidee  zabor-kviar  twtuo  cidhoex. 
Koq  u  cidee  svix  Liie^ee.   U  cidee  haxsvy  si  nngxhoex. 

Svix  Liie^ee  paethog  cidee  hmlaang  khix  ka  hit'ee  svix  Tviw^ee  korng:   "Lie  ee  zabor-kviar  tioh  laai  zox  ho  goan-hauxsvy."

Svix  Tviw^ee  thviakvix,  cyn-siuxkhix  ciu  korng:
"Goar  ee  zabor-kviar  kinnii  ciaq  cidhoex,  yn-hauxsvy  ykefng  nngxhoex  laq,  afnny  kiarm  mxsi  kex  toa-cidpoe  ee  leq.     Na  afnny  sngx^khylaai, goarn-zabof-kviar  na  goxzap'hoex,  yn-hauxsvy  ciu  cidpah'hoex  laq.   Goar  nar  khefng  ka  goarn-zabor-kviar  phoex  hiahniq'lau  ee  kviafsaix  leq?" 

Yn-bor  zhutlaai  ciu  korng:
"Afnny  lie  sngx-mxtioh  laq.   Zabor-kviar  kinnii  suijieen  si  cidhoex,  mxkuo  tarn  kaux  menii  ciu  kab  yn-hauxsvy  tangnii  laq,  afnny  mxhor!" 

Zaixzar  ti  cidee  sofzai,  u  cidee  akofng,  yn-kviar,  kab  yn-swn  ti^teq.

U-cidjit,  svalaang  siang-toq  ciaqpng.   Hit'ee  swn  cyn-phvae.    M  ciaqpng,  kantvaf  boeq  ciah  zhaix.     Tohterng  ee  zhaix,  taghang  tof  gvoeq-khylaai  ciah,  ar  ka  zhaethngf  tiq-kaux  moaftoq.

Hitsii  yn-kofng  ka  y  ma,  yn-swn  mxthviaf,  yn-kofng  siuxkhix  ciu  ka  y  phaq-cid'e.

Hit'ee  gyn'ar  ee  lauxpe  khvoarkvix  yn-lauxpe  teq  phaq  yn-kviar,  zafmjieen  mxkafm,  sviu  boeq  tuix  yn-lauxpe  laai  uixtioh  yn-kviar  keakaux.

Mxkuo  afnny  ma  cyn-phvaysex,  ciaq  mxkvar.   Putkox,  na  boo  kab  y  keakaux,  yn-kviar  kantvaf  ho  y  phaq^khix,  simlai  boexafn.

Y  liampvy  sviuxzhud  cidee  hoatto,  ciu  tuix  y-kaki  ee  thaukhag  phaq-cid'e.

Hitsii  akofng  khvoartioh  yn-kviar  teq  phaq  kaki,  ciu  mng  y  ui  symmih.

Yn-hauxsvy  ciaq  ixn  y  korng:
"Lie  tof  phaq  goar  ee  kviar,  sofie  goar  ciu  phaq  lie  ee   hauxsvy."

U-cidee  cyn-pintvoa  ee  zabor,  ciah-zheng  taghang  lorng  si  yn-afng  zhoan-hofhor  laai  ho  yi.   Yi  kantvaf  oexhiao  svaf  na  laai  ciu  zunchiuo  khix  zheng,   png  na  laai  ciu  khuizhuix  khix  ciah,  afnny  naxtvia.

U-cidjit,  yn-afng  boeq  khix  hngxlo,  tioh  kaux  goxjit-au  ciaq  oexthafng  tngr^laai.    Sviuxtioh  yn-bor  hiahniq  pintvoa,  kviaf  yi oe  goxsie. 

Sviuxlaai-sviuxkhix,  y  ciaq  sviuxzhud  cidee  hoatto.     Y ciu  ciefn  cidtex  toaxpviar,  sviuxboeq  ho  yi  zox  goxjit  ee  ciaqsit,  ka  hef  pak  ti  yi  ee  axmkurn,  afnny  ciaq  horngsym  zhutmngg^khix.

Boo-gigo,  kaux  yn-afng  tngr^laai  ee  sizun,  hit'ee  bor  ykefng  goxsie  svajit   laq.   Hitsii,  yn-afng  toaxtoa  tioqkviaf,  kvoafkirn  jip  paang  khix  khvoax.    Y  khvoarkvix  hit'ee  axmkurn^nih  ee  hittex  pviar,  kantvaf  bixnzeeng  kixn'oar  zhuix  ee  poxhun,  u  ka  cidkak'ar  khylaai  ciah  naxtvia.   Padui  lorng  iugoaan  hofhor. 

Hef  ciuxsi   chiuo  bo'aix  tyntang,  bo'aix  ka  pviar  soar-koealaai  ciah  ee  kietkor.

Lirn  khvoax,  zef  kiarm  mxsi  toa-pintvoa  ee   zabor-laang  leq?

U  cidkefng  zhux,  laai  thofsiaux  ee  laang  cinzoe.    Hiah'ee  y'ar kab  yliaau  lorng  ze  kaux  moafmoar.   Iao  koq  u  cidee  laang  ze  ti  hoxteng^nih.   Zwlaang  ciu  ka  y  korng:
"Ch^iar  lie  bin'afzafkhie  khaq-zar  laai  ze." 

Hit'ee  thofsiaux^ee  ciu  kaki sviu:
"Zef   tekkhag  si  teq  piawsi  bin'afzafkhie  zwlaang   boeq  taixsefng  heeng  goar  ee  siaux."
Afnny  simlai  hvoahie,  ciu  toaxsviaf  hoaq-korng:
"Citkefng  zhux  cincviax  bocvii  laq.   Larn  taixkef  tngr^laikhix  ox." 

Kehtngr  zafkhie  cinzar,  hit'ee  laang  ciu  taixsefng  khix,  kiox  zwlaang  heeng  y  ee  cvii.

Zwlaang  ciu  korng:
"Goar  mxsi  sviuxboeq  heeng  lie  ee  cvii,  si  in'ui  lie  zaxhngf  ti  hit'ee  hoxteng  ze,  goar  simkvoaf-lai  koex-boextid-khix,  sofie  ciaq  chviar  lie  kin'afjit  khaq-zar  taxmpoq'ar  laai,  thafng  ze  citliaau  ie.   Goar  sviu  afnny  padlaang  na  laai,  lie  to  biefnkviaf  bo'ui  thafng  ze." 

Hit'ee  thofsiaux^ee  thviakvix  cit'ho  oe,  ciu  siuxkhix-kaq  pvoarsiofsie,  ciu  mxkoq  tarn  laq.   Y  ienlo-kviaa  ienlo-karnkiau  hit'ee  zwlaang.